***
በ2017 ዓ.ም በአቅም ማሻሻያ (ሪሚዲያል)  ፕሮግራም በትምህርት ሚኒስትር አማካኝነት በደባርቅ ዩኒቨርሲቲ ለተመደባችሁ ተማሪዎች በሙሉ፦

ምዝገባ የሚካሔደው ጥር 29-30/2017 ዓ.ም እና በቅጣት ምዝገባ የካቲት 1/2017 ዓ/ም መሆኑን አውቃችሁ ለምዝገባ ስትመጡ ከ8ኛ ክፍል ጀምሮ ያሉ የትምህርት ማስረጃዎች እንዲሁም ብርድ ልብስ፣ አንሶላ እና ትራስ ጨርቅ መያዝ እንደሚጠበቅባችሁ ዩኒቨርሲቲው ያሳስባል። 

ታህሳስ 30/2017 ዓ/ም
የህዝብና አለም አቀፍ ግንኙነት ስራ አስፈፃሚ

ደባርቅ ዩኒቨርሲቲ የግዕዝ ቋንቋ እና የብራና ፅሁፍ አውደ ርዕይ አካሄደ

በደባርቅ ዩኒቨርሲቲ ሀገር በቀል ዕውቀት ማስተባበሪያ ጽ/ቤት አዘጋጅነት፤የዩኒቨርሲቲው ማህበረሰብ እና ከደባርቅ ከተማ አስተዳደር አብያተ ክርስቲያናት ጥሪ የተደረገላቸው የቅኔ መምህራን በተገኙበት ትላንት ታህሳስ 24/2017 ዓ.ም የግዕዝ ቋንቋ እና የብራና ፅሁፍ አውደርዕይ ተካሄደ፡፡

አውደርዕዩን በመክፈቻ ንግግር ያስጀመሩት የፕሬዚዳንት ጽ/ቤት ኃላፊ እና የአካ/ምር/ማ/ሰብ/አገ/ቴክ/ሽግ/ተ/ም/ፕሬዚዳንት ጋሻው ግስሙ (ዶ/ር) አላማው ለግዕዝ ቋንቋ ተገቢ ትኩረት በመስጠት ቋንቋው በውስጡ የያዘውን ሀገር በቀል ዕውቀት ትውልዱ እንዲጠቀምበት ለማስቻል መሆኑን ገልፀዋል፡፡ ዶ/ር ጋሻው አያያዘውም ዩኒቨርሲቲው በሂደት የግዕዝ ቋንቋ ትምህርት ለመጀመር እየሰራ መሆኑ እንደተጠበቀ ሆኖ በቅርቡ በቅዳሜ እና እሁድ እስከ ሶስት ወራት የሚዘልቅ የአጭር ጊዜ የግዕዝ ቋንቋ ስልጠና መስጠት የሚጀምር መሆኑን አብስረዋል፡፡

በመርሃ-ግብሩ በጎንደር ዩኒቨርሲቲ የግዕዝ ቋንቋ መ/ር ፀዳሉ አዲሱ እና የጎንደር የብራና ፅሁፍና ምርምር ማዕከል ስራ አስኬጅና የስነ መለኮት ምሩቅ መ/ር ግዛቸው ጥጋብ ጥናታዊ ፅሁፍ ማቅረባቸው ታውቋል፡፡ በመምህር ፀዳሉ አዲሱ “የማህበረ ቅኔ ውይይት” በሚል መነሻ ሀሳብ የቀረበው ጥናታዊ ፅሁፍ ውጤታማ የሆነው የግዕዝ ቋንቋን የማስተማር ስነ-ዘዴ በዘመናዊ የመማር-ማስተማር ስርዓቱም ተግባራዊ ቢደረግ አዋጭነት እንዳለው በጥናቱ ተዳስሷል፡፡

በመምህር ግዛቸው ጥጋብ በኩል “የብራና ፅሁፍ አጀማመር እና ታሪካዊ ዕድገት” የፅሁፍ ኪህን ጥበብ ከቦታ ቦታ ልዩነት ፣የብዕር አዘገጃጀት እና አጠቃቀም፣የብራና ቆዳ አዘገጃጀት ሂደት፣የቀለም ዓይነቶች አዘገጃጀት በሚሉ ይዘቶች ፅሁፍ ቀርቦ ሰፊ ውይይት ተደርጓል፡፡

ከአማርኛ እና ከግዕዝ ቋንቋዎች የቅኔ ልዩነት፣ከግዕዝ ቋንቋ የተለየ ሚስጥራዊነት፣የብራና ፅሁፍን እና ድጅታላይዜሽንን ማስታርቅ ስለሚቻልበት ሁነታ፣ስለቁም ፅህፈት ምንነት፣የአባቶችን ሙያ ማስቀጠል ስለሚቻልበት ሁኔታ፣ስለግዕዝ ቋንቋ ስልጠና አጀማመር ከተሳታፊዊች ሀሳብ እና አስተያየቶች ተሰጥተዋል፡፡

ታህሳስ 25/2017 ዓ.ም

የህዝብና አለም አቀፍ ግንኙነት ስራ አስፈፃሚ

ደባርቅ ዩኒቨርሲቲ ከትምህርት ሚኒስቴር ጋር የአፈፃፀም ስምምነት ውል (performance contracting agreement) ተፈራረመ

የከፍተኛ ትምህርት ተቋማት የሪፎርም ስራዎችን ተከትሎ ደባርቅ ዩኒቨርሲቲ በቁልፍ የአፈጻጸም አመላካቾች (KPIs) ዛሬ ታህሳስ 16/2017 ዓ/ም ከትምህርት ሚኒስቴር ጋር የዩኒቨርስቲው የስራ አመራር ቦርድ ሰብሳቢ የተከበሩ አቶ አክሊሉ ታደሰ በተገኙበት የአፈፃፀም ውል መፈራረሙን የዩኒቨርሲቲ ተ/ፕሬዚዳንት ዶ/አስማማው ዘገዬ አስታውቀዋል።

ዶ/ር አስማማው ስምምነቱ በዩኒቨርሲቲው ብቁና ተወዳዳሪ ምሩቃንን ለማፍራት እንዲሁም ተጠያቂነትን ለማስፈን እና ውጤታማነትን ለማረጋገጥ ያስችላል ብለዋል። ዶ/ር አስማማው አክለው እንደገለፁት በቁልፍ አመላካቾች ዙሪያ በዩኒቨርሲቲው ለሚገኙ የስራ ክፍሎች የግንዛቤና የእውቅና ፈጠራ እንዲሁም የእቅድ ክለሳ ስራ ሲሰራ መቆየቱን ጠቅሰው በቀጣይም የውል ስምምነቱ በየዘርፍ ለሚገኙ ምክትል ፕሬዘዳንቶች በተዋረድ ከአካዳሚክ ዳይሬክቶሬቶች፣ አስተዳደር ስራ አስፈፃሚዎች፣ ኮሌጅ ዲኖች ፣ ትምህርት ክፍሎች እና ማስተባባሪ ፅህፈት ቤቶች ጋር የውል ስምምነት እንደሚፈረም ገልፀዋል።

ትምህርት ሚኒስቴር በቁልፍ የአፈጻጸም አመላካቾች (KPIs) ከሁሉም የመንግሥት ዩኒቨርሲቲዎች ጋር ስምምምነት መፈራረሙ የታወቀ ሲሆን ስምምነቱ ግልጽነትና ተጠያቂነትን ማስፈንን፣ ውጤታማነትን ማሳደግን፣ የአፈጻጸም አቅምን መገምገምና ለስኬቱም ዕውቅና እና ሽልማትን መስጠትን ታሳቢ ያደረገ መሆኑን ለመረዳት ተችሏል።

ታህሳስ 17/2017 ዓ/ም

የህዝብና አለም አቀፍ ግንኙነት ስራ አስፈፃሚ